AGR fær framhaldsstyrk hjá Tækniþróunarsjóði

Tækniþróunarsjóður samþykkti nýverið að veita AGR áframhaldandi styrk til þróunar á frumgerð hugbúnaðar sem hjálpar til við að gera söluáætlanir og miðla uppslýsingum um aðfangakeðjuna. Verkefnið heitir Nostradamus og hefur því verið veitt styrkur að upphæð 8 milljónir á ári. Áætlað er að verkefnið verði tvö ár í þróun, en það hófst árið 2008. „Markmið okkar er að þróa kerfi sem brúar bilið milli innkaupa- og söludeilda fyrirtækja, eykur áreiðanleika söluáætlana og skilvirkni í söluáætlanaferlinu.“ segir Haukur Hannesson, framkvæmdastjóri AGR.

Verkefnið byggir á grunni þeirrar þekkingar og færni sem starfsmenn AGR hafa byggt upp í samvinnu við viðskiptavini sína á undanförnum árum ásamt þekkingu Háskólans í Reykjavík og erlendra samstarfsaðila. „Við höfum greint skýra þörf fyrir kerfi sem beitir svipaðri aðferðafræði við gerð söluáætlana og AGR-Innkaup byggir á. Markaðurinn er stór þar sem söluáætlanir eru mikilvægustu áætlanir flestrar fyrirtækja og vonumst við til að geta þróað byltingarkenndan hugbúnað fyrir þennan markað.“ segir Hlynur Stefánsson verkefnisstjóri.